Unha escola para a supervivencia

En pouco máis de dúas semanas, do 23 ao 25 de maio, arrincará en Allariz (Ourense) a próxima Escola Ramón Fernández Durán, unha escola para a reflexión e a acción colectiva dos movementos sociais que comezou en 2015 como iniciativa da coordinadora Baladre, CGT e Ecoloxistas en Acción, e que percorreu distintos lugares da península.

Desde entón, abordamos temas sociopolíticos de especial relevancia na conxuntura de cada edición, como as distintas crises: climática, económica, enerxética; a garantía dos dereitos básicos: alimentación, vivenda, saúde e coidados; a guerra e o militarismo; e, en xeral, alternativas para transitar cara unha sociedade poscapitalista.