Que é a Escola Ramón Fernández Durán?

A Escola Social Ramón Fernández Durán xorde como homenaxe ao pensador e activista Ramón Fernández Durán.

Trátase dun espazo autoxestionado de coñecemento mutuo, relación e reflexión para a acción social e colectiva entre xente inqueda que temos ganas de xuntarnos e compartir: “que estamos a facer” para “facer xuntas”; discutir, rir, divertirnos, construír e deconstruír… Soñando moitos mundos onde a xustiza social, a igualdade, a solidariedade, o respecto polo medio ambiente e as persoas sexan utopías por acadar.

Se tes inquedanza por cambiar este sistema capitalista inhumano e che apetece compartir reflexións e análises sociopolíticas, así como propostas para transitar xuntas cara a outros mundos máis humanos e sustentables, non o dubides, este é o teu lugar.

Quen puxo en marcha esta escola?

Esta escola foi fundada por Ecoloxistas en Acción, CGT e Baladre, pero está aberta e quere contar con todos os colectivos e movementos sociais, así que se o teu colectivo está interesado en participar na súa organización, non dubides en contactar connosco.

Quen era Ramón Fernández Durán?

Ramón Fernández Durán foi un pensador crítico e activista precursor dos movementos sociais e fundador de Ecoloxistas en Acción.
Dedicou a súa vida en corpo e alma a loitar contra a globalización capitalista e a era do petróleo, tecendo redes entre moi diversos colectivos sociais, ligando o ecoloxismo social co anarcosindicalismo e coa loita desde abaixo das excluídas do sistema.

Publicou multitude de libros, entre os que cómpre destacar Capitalismo (financeiro) global e guerra permanente, A complexa construción da Europa superpotencia, O crepúsculo da era tráxica do petróleo: Pico do ouro negro e colapso financeiro (e ecolóxico) mundial, e A Quebra do Capitalismo Global: 2000-2030.

Se queres saber máis sobre el, visita o blog A Explosión da Desorde.